അന്ന് അവന്റെ ജ്ഞാനസ്നാന ദിനമായിരുന്നു
അവനെന്നാല് ജോണ് എബ്രഹാം
അവന് ഏറെപ്പേരെ ജ്ഞാനസ്നാനം ചെയ്യിച്ചു
അഗ്രഹാരങ്ങള് വെടിപ്പായി
കള്ളും കഞ്ചാവും അവന്റെ ട്രൌസറിനുള്ളില് ഒളിച്ചിരുന്നു
കുഞ്ഞിരാമന് നായര് കുട്ടികള്ക്ക് മിഠായി കൊടുക്കുമ്പോലെ
അവനത് ശിഷ്യര്ക്ക് വീതിച്ചുകൊടുത്തു
തന്റെ ഓര്മ്മക്കായി ഫിലിം ഫെസ്റ്റിവല് നടത്തണമെന്ന ഉപദേശത്തോടെ
അവന് അന്ത്യക്രിസ്തുവായിരുന്നു
യോഹന്നാനെപ്പോലെ അവന് മുമ്പില് ഋതിക് ഖട്ടക് നടന്നു
ശിഷ്യരായി അടൂരും അരവിന്ദും കുമാരനും ജോര്ജ്ജും പിന്തുടര്ന്നു..
പ്രിയദര്ശനന്ന് ലാലുമായി ചങ്ങാത്തത്തിലായിരുന്നെത്രെ, പിള്ളാര്!
കാലം കടന്നുപോയി, ജീവിതം കയ്ച്ചുകയ്ച്ച് അവന് കുരിശിലേറി
സിനിമാകൊട്ടക പോലൊരു കെട്ടിടത്തിന്റെ മുകളില് നിന്ന് അവന് പറന്നു
താങ്ങാന് മാലാഖമാര് വന്നില്ല, നിന്റെ ഹിതം നടക്കട്ടെ
എന്നാണല്ലോ അവന് ദൈവത്തോട് പറഞ്ഞത്..
അവന് മരിച്ചില്ല, നമ്മള് നടത്തുന്ന ജോണ് എബ്രാഹം
ചലച്ചിത്രോത്സവങ്ങളില് അവനുയിര്ത്തു
അവന്റെ സിനിമകള് തിരശീലയില് തിളങ്ങുമ്പോള്
ചിരിച്ചതെന്തിന് തീയേറ്റര്?
*ബാലചന്ദ്രന് ചുള്ളിക്കാടെഴുതിയ 'എവിടെ ജോണ്' എന്ന കവിതയ്ക്ക് ഒരു പുതിയ അനുബന്ധം
ലോഡുചെയ്യുന്നു...
പ്രതികരണങ്ങള്